விருதுகள் - 2005

ஒவ்வோரு ஆண்டின் இறுதியிலும் செய்தி ஊடகங்கள் போட்டி போட்டுக் கொண்டு அந்த ஆண்டின் சிறந்தவைகளை பட்டியலிடுவது வழக்கம். இதோ நமது பட்டியல் !

தமிழ் திரையுலகம்

• திரைப்படம் - தவமாய் தவமிருந்து
• குணசித்திர நடிகர் - ராஜ்கிரன் (தவமாய் தவமிருந்து)
• நகைச்சுவை நடிகர் - விவேக் (அன்னியன்)
• கதாநாயகன் - விக்ரம் (அன்னியன்)
• கதாநாயகி - அசின் (கஜினி)
• திரைப்பட இசை - ஹாரிஸ் ஜெயராஜ் (அன்னியன்)
• பாடல் - மயிலிறகே - வாலி (அ..ஆ)
• இயக்குனர் - சேரன் (தவமாய் தவமிருந்து)
• திரைக்கதை - சந்திரமுகி (வாசு)

விளையாட்டு

• கிரிக்கெட் வீரர் - இர்ஃபான் பதான்
• டென்னிஸ் வீராங்கனை - சானியா மிர்சா

தொலைக்காட்சி

• நீள்தொடர் - மெட்டி ஒலி (சன்)
• தொடர் - சிதம்பர ரகசியம் (சன்)
• நகைச்சுவை காட்சிகள் - ஷோ டைம் (ஜெயா)
• செய்திகள் - என்.டி.டிவி
• விளையாட்டு - சீ. ஸ்போர்ட்ஸ்
• நிகழ் தொடர் - அரட்டை அரங்கம் (சன்)
• பழைய பாடல்கள் - தேனமுது (ஜெயா)
• பாடல் வரிசையமப்பு - சூப்பர் 10 (சன்)

அரசியல் & சமூகம்

• அமைப்பு - இந்திய தேர்தல் ஆணையம் (பீகார் தேர்தலுக்காக)
• நகரம் - மும்பை (26/7 பேரழிவிலிருந்து மீண்டு வந்ததற்காக), பெங்களூர் (கணினி தொழில்நுட்ப வேலை வாய்ப்புகள்)
• ஏழை மக்கள் மறுவாழ்வு - மும்பை (சேரி மக்களுக்கு 53000 வீடுகளை கட்டிக்கொடுத்ததற்காக)
• தொலைபேசி நிறுவனம் - ரிலையன்ஸ் (இந்திய அளவில்), ஏர்செல் (தமிழக அளவில்), டாடா (வாழ்நாள் இலவசம் - உள்வரும் அழைப்புகள்)
• மென்பொருள் நிறுவனம் - இன்ஃபோசிஸ்
• நிர்வாகத் தலைவர் - நாராயணமூர்த்தி (இன்ஃபோசிஸ்)
• மாநிலம் - தமிழகம் (சாலை வசதிகள், தூய்மையான கோயம்பேடு பேருந்து நிலையம், அரசு நிர்வாகம் மற்றும் ஒரளவுக்கு திறம்பட செயல்பட்ட
  பேரழிவு நிவாரணப் பணிகள் மற்றும் சமாளிப்பிற்காக (வெள்ள நிவாரண சாவுகள் தவிர்த்து))

பின்குறிப்பு : இவை முழுவதும் என் கவனத்திற்குள்ளான செய்திகளின் / ரசனைகளின் மீதான மதிப்பீடு மட்டுமே. இவைகளிலிருந்து நீங்கள் மாறுபட்டால் பின்னூட்டங்களில் உங்கள் கருத்துகளை இடலாம். மேலும் விருதுகளை தெரிவிக்கலாம் !!

வாசனையுடன் ஓர் பதிவு

வலைப்பதிவர்களுக்கும், நண்பர்களுக்கும், வாசகர்களுக்கும், தமிழ்மணம் நிர்வாகத்தினருக்கும் புத்தாண்டு வாழ்த்துகள் ! கடுமையான வேலைப்பளுவின் காரணமாக நீண்ட நாட்கள் இடைவெளிக்கு பின் இப்போது பதிவிடுகிறேன்.

கடந்த இருபது நாட்களில் நிறைய சம்பவங்கள் நடந்து விட்டன. இந்தியா, இலங்கையை கிரிக்கெட் டெஸ்ட் போட்டிகளில் அபாரமாக வென்றது. சாம்பியன்ஷிப் ஹாக்கி போட்டிகளில் மரண அடி வாங்கியுள்ளது. பாரளுமன்றத்தில் மக்கள் பிரதிநிதிகளின் பதவி பறிபோயுள்ளது. சுனாமி நினைவுதினமன்று பத்திரிக்கைகளும், தொலைக்காட்சிகளும் போட்டி போட்டுக்கொண்டு பாதிக்கப்பட்டவர்களின் பேட்டிகளை வெளியிட்டன. தமிழ்நாட்டில் வெள்ள நிவாரணம் வாங்க வந்தவர்களிடம் கூட்ட நெரிசல் ஏற்பட்டு நிறைய பேர் இறந்தனர். வழக்கம்போல் அரசு தொலைக்காட்சியும், எதிர்க்கட்சி தொலைக்காட்சியும் இதை முடிந்த அளவுக்கு அரசியலாக்கின.வலைப்பதிவுகள் வழக்கம்போல் வெளிவந்தன.

2005ம் வருடத்தில் இந்தியாவில் நிறைய சோக சம்பவங்கள் நடந்து விட்டன. மும்பையில் மழை, வெள்ள அழிவுகள், காஷ்மீரில் பூகம்பம், குஜராத், ஒரிஸ்ஸாவில் மழை, வெள்ளம், தமிழ்நாட்டில் வெள்ள அழிவுகள், கூட்ட நெரிசல் பலிகள், பாரளுமன்ற பிரதிநிதிகள் பதிவிபறிப்பு என நிறைய
சம்பவங்கள் நடந்து விட்டன. இவைகளிலிருந்து மக்களும், அரசாங்கமும் பாடம் கற்று, எதிர்காலத்திலாவது இயற்கை பேரழிவுகளை எதிர்கொள்ள ஓரளவாவது தயார்நிலையில் இருக்க வேண்டும். 2006ம் வருடம் உலக மக்கள் அனைவருக்கும் மகிழ்ச்சியையும், அமைதியையும் தர இறைவனை பிரர்த்திப்போம். மீண்டும் உங்கள் அனைவருக்கும் என் மனங்கனிந்த புத்தாண்டு வாழ்த்துகள் !

கல்லூரியில் படிக்கும் காலத்திலிருந்தே கவிதை என்ற பெயரில் ஏதாவது கிறுக்குவது வழக்கம். இதோ வாசனைக் கவிதையை வாசியுங்கள், ஏதாவது புரிந்தால் பின்னூட்டத்தில் கெட்ட வார்த்தைகள் தவிர்த்து, மற்ற வார்த்தைகளில் எனக்கு எழுதுங்கள் !

வாசனை

தூக்கம் வர மறுத்த ஓரிரவில்

ஞாபகம் வந்தது உன் வாசனை..

பேருந்தில் உன் தோள் மேல் கைபோட்டு

நெருங்கி உட்கார்ந்திருந்த போது வந்த வாசனை..

வாசனைத் திரவியங்கள் உபயோகப் படுத்தும்

பழக்கமில்லாத உன்னை, உன் வாசனையினால்

இன்னும் பிடித்துப் போனது, எனக்கு...

உன் பெயரை எங்காவது பார்க்கும்போதும்

படிக்கும்போதும், ஞாபகத்தில் வருவது

உன் உருவமும், வாசனையும்தான்..

இன்றும் கூட எப்போதாவது தொலைபேசியில்

உன்னுடன் பேசினால், பேசி முடித்து விட்டு

முகர்ந்து பார்க்கிறேன், உன் வாசனையை...

எங்கோ பிறந்தோம், எங்கோ வளர்ந்தோம்..

ஏதோ ஒரு புள்ளியில் சந்தித்தோம்..

உனக்கும், எனக்கும் நம்மை பிடிக்கும் முன்பே

பிரிந்து விலகினோம்...எதனால் நாம் பிரிந்தோம்..

மறுபடியும் சேருவோமா..காரணம்

தெரிய வில்லை, புரிய வில்லை...

இருப்பினும் தூக்கம் வராத இரவுகளில்,

இன்னமும் நுகர்கிறேன், உன் வாசனையை !!!

கிரிக்கெட் - திருச்சி - கணிப்பொறி - பயணம்

நண்பர் 'பத்ரி' தொடங்கியிருக்கும் கிரிக்கெட் வலைப்பதிவில் நானும் உறுப்பினராகி விட்டேன். இன்று ஒரு பதிவு சச்சினைப் பற்றி எழுதியிருக்கிறேன். அதற்கான சுட்டி இங்கே 'சச்சின் - டெல்லி - 35 ?'

திருச்சியைப் பற்றி எழுதிய பதிவிற்கு நல்ல வரவேற்பு கிடைத்தது. பதிவின் இரண்டாம் பாகம் தயாரகிறது. கூடிய சீக்கிரம் வெளியிட்டு விடலாம்.

நேற்று இரவு என்.டி.டிவியில் மைக்ரோசாப்ட் பில்கேட்ஸ் - இன்போசிஸ் நாராயணமூர்த்தி - பிரணாய் ராயின் கலந்துரையாடல் ஒளிபரப்பானது. 1.7 பில்லியன் டாலர் மைக்ரோசாப்ட் இந்தியாவில் முதலீடு செய்யப் போவதாக செய்தி வந்துள்ளது. பில்கேட்ஸின் பேச்சில் செயற்கை தன்மை நிறைய இருப்பது போல் எனக்கு தோன்றியது. மூர்த்தி இயல்பாக பேசினார். கொஞ்ச நேரம் பார்த்து விட்டு ஜெயா டிவி 'ஷோ டைம்' நிகழ்ச்சிக்கு சென்று விட்டோம்.

மும்பையில் கன்சோலியிலிருந்து சான்படாவிற்கு மாறி விட்டேன். தினமும் அலுவலகத்திற்கு மின்சார தொடர்வண்டியில்தான் (ட்ரெயின்) வருகிறேன். பயணம் சுவாரசியமாக இருக்கின்றது, கூட்டமே இல்லை. இத்தடம் (தானே - வாஷி) புதிதாகையால் கூட்டம் இல்லை.

7 வருடங்கள் கழித்து கல்லூரி நண்பனை சந்திக்க முடிந்தது. தற்போது இவர் என்னுடனே தங்கியிருக்கிறார். மும்பை பன்னாட்டு வங்கி ஒன்றில் பணி புரிகிறார். தினமும் கல்லூரி நாட்களைப் பற்றி பேசி நினைவலைகளில் நனைந்து கொண்டிருக்கிறோம். சுவாரசியமான சம்பவங்கள் பதிவுகளாக வெளிவரும் வாய்ப்புகள் உள்ளன.

தமிழ்மணத்தில் நட்சத்திர பதிவுகள் கலக்கிக் கொண்டிருக்கின்றன. தருமி, கோ. கணேஷ், ஜோ போன்றவர்களின் ராஜபாட்டையை தொடர்ந்து குழலியும் இந்த வாரம் கலக்கிக் கொண்டிருக்கிறார். வாழ்த்துக்கள் நட்சத்திரமாய் கலக்கியவர்களுக்கும், கலக்கப் போகின்றவர்களுக்கும் !!!

நம்ம ஊர் திருச்சி

மலைக்கோட்டை மாநகரம் திருச்சிராப்பள்ளியைப் பத்தித்தாங்க பேசப் போறேன். ரொம்ப நாளாச்சுங்க நம்ம ஊரைப் பத்தி பேசி. அதான் கொஞ்சம் நினைவலைகளில் நனையலாமேன்னு உங்ககிட்ட பேசறேன். நான் பொறந்தது ஜெயங்கொண்டம் பக்கத்துல ஒரு கிராமத்துலங்க. திருச்சியிலதான் படிச்சேன். 1991 -லிருந்து 1998 வரைக்கும் அங்கதாங்க இருந்தேன். வாங்க, நடந்துகிட்டே பேசுவோம்!

ஏங்க, திருச்சின்னா உங்களுக்கு என்ன ஞாபகத்துக்கு வரும் ? மலைக்கோட்டை, ஸ்ரீரங்கம், சமயபுரம், காவேரி, முக்கொம்பு, கல்லணைன்னு எதுவாச்சும் ஞாபகத்துக்கு வருதுல்லியா ? எனக்கு ஒரு ஐஸ்கீரீம் கடைதாங்க ஞாபகத்துக்கு வரும்.

• வனிலா ஐஸ்கீரீம் ரூ 1.50
• சாக்லேட் ஐஸ்கீரீம் ரூ 2.00
• புரூட்சாலட் ஐஸ்கீரீம் ரூ 2.00

இதுதாங்க ஐஸ்கீரீம் மெனு. எங்கே தெரியுமா ? திருச்சி தெப்பக்குளம் போஸ்ட் ஆபிஸ் பக்கத்துல 'மைக்கேல்ஸ் & சன்'னுன்னு ஒரு கடை இருக்குங்க (இப்ப கூட இருக்குதுங்க, இப்ப திருச்சியிலேயே நிறைய இடங்கள்ள கிளைகள் திறந்துட்டாங்க). இந்த கடை ரொம்ப பிரபலங்க. சின்ன கடைதான். ஒரு இருபது பேர்தான் உட்காரலாம் ஒரே சமயத்தில. ரொம்ப டேஸ்ட்டா இருக்கும் ஐஸ்கீரீம். நாங்கல்லாம் ஸ்கூல் படிக்கிறப்ப தினமும் சாயந்திரம் இங்க வந்துருவோம்.

நான் செயிண்ட் ஜோஸப் காலேஜ்லதாங்க படிச்சேன். காலேஜ் படிச்சப்பவும் இங்கதாங்க வருவோம். இந்த கடைக்கு பின்னாடி ஹோலிகிராஸ் பெண்கள் பள்ளி மற்றும் கல்லூரி, எதிர்த்தாப்ல பிசப் ஹிபர் பள்ளி, பக்கத்துல செயிண்ட் ஜோஸப் பள்ளி மற்றும் கல்லூரின்னு ஓரே இளைஞர்கள் கூட்டமாத்தான் இருக்கும் எப்பவும். பக்கத்துலதான் மலைக்கோட்டை. அங்க சுத்திப் பாக்க வர்ரவுங்க கூட இங்கே வருவாங்க. இப்ப ஒரு ரூவா விலை ஏத்தியிருக்காங்க. எனக்கு தெரிஞ்சு உலகத்துலேயே குறைந்த விலைக்கு தரமான ஐஸ்கீரீம் கிடைக்கிற இடம் இதுதான் நினைக்கிறேங்க. நீங்க திருச்சிதானா ? இல்லைன்னா ஒரு தடவை திருச்சி போயிட்டு வாங்களேன், சூப்பர் ஊருங்க !

என் கல்யாணத்துக்கு இந்த ஐஸ்கீரிம் கடையில்தான் டீரிட் கொடுக்கலாம்னு இருக்கேன். 100 பேர் சாப்பிட்டாலும் ரூ 1000க்கும் மேல பில் வராது. என்ன சொல்றீங்க ?

இந்த கடைக்கு பின்னால இருக்குற தெருவுலதாங்க 'பனானா லீஃப்' ன்னு ஒரு ஹோட்டல் இருக்குங்க. சாப்பாடு தலை வாழை இலைல சூப்பரா போடுவாங்க. எல்லா வெரைட்டிஸூம் இங்க கிடைக்கும்ங்க. ஆனா அசைவம் கிடையாதுன்னு நினைக்கிறேன். சரியா ஞாபகம் இல்லீங்க !

திருச்சியில நிறைய தரமான ஹோட்டல்கள் இருக்குங்க. இருந்தாலும் ரோட்டோர நைட் கடைகளும் நிறைய இருக்குங்க. இந்த மாதிரி ரோட்டு கடையில இட்லி, தோசை, பரோட்டா எல்லாம் சாப்பிட்டு ஒரு நாலு ஆம்லெட், ஆஃப்பாயில் சாப்பிடற சுகமே சுகந்தாங்க. அவ்வுளவு அருமையா இருக்கும் !

என்னடா இவன் சாப்பாடைப் பத்தியே பேசிக்கிட்டு இருக்கானேன்னு பாக்குறீங்களா ? கோச்சுக்காதீங்க, எனக்கு சாப்பாடைப் பத்தித்தான் எப்பவும் நினைவு.

இப்ப திருச்சியில உள்ள சுற்றுலா தளங்கள் பற்றி பேசுவோமா ? மலைக்கோட்டைதாங்க முதல்ல. நீங்க மெயின்கார்டுகேட்ல இறங்கனீங்கன்னா அப்படியே எதிர்த்தாப்ல நடந்து போயிறலாம். மலைவாசல் கீழே டிக்கெட் வாங்கிகிட்டு (ரூ 2) விநாயகர் ஒருத்தரு இருப்பாரு, அவர கும்புட்டுட்டு அப்படியே படிகள்ள ஏறீனீங்கன்னா, தாயுமானவர் கோயில் வருங்க. நல்லா பொறுமையா சுத்திப்பாத்துட்டு இன்னும் கொஞ்சம் மேல ஏறீனீங்கன்னா மலைக்கோட்டை உச்சிப் பிள்ளையார் கோயிலுக்கு வந்துருவீங்க. மொத்தம் 470 படியோ என்னமோ. மேல ஏறினப்புறம் திருச்சியவே பாக்கலாம். பிரமாண்டமா இருக்கும். காத்து பிச்சிகிட்டு வரும் பாருங்க, இதாங்க பூலோக சொர்க்கம் !

மெயின்கார்டுகேட் எதிர்த்தாப்ல, எங்க செயிண்ட் ஜோஸப் கல்லூரி வளாகத்துலேயே ஒரு பெரிய பழமையான சர்ச் இருக்குங்க. நான் காலேஜ் படிச்சப்ப அடிக்கடி இங்க போவோம். ரொம்ப உயரமானது. மலைக்கோட்டை உயரம் வரும்னு நினைக்கிறேன். இந்த சர்ச்சும் ரொம்ப நல்லா இருக்கும்ங்க.

அப்புறம் ஸ்ரீரங்கம் அரங்கநாதர் கோயிலுங்க. ஆசியாவிலேயே உயரமான கோபுரம்ன்னு சொல்றாங்க. நல்லா இருக்கும்ங்க கோயில். அரங்கநாதர் பள்ளிகொண்ட நிலையில் பரவசப் படுத்துவாருங்க. நம்ம சுஜாதா சார் ஸ்ரீரங்கம் பத்தி நிறைய சொல்லியிருக்கார், நீங்க படிச்சிருக்கிங்களா ? நம்ம தேசிகன் கூட ஸ்ரீரங்கம் சொக்கப்பானைன்னு ஒரு பதிவு போட்ருந்தாருங்க. சூப்பர் கோயிலுங்க, நீங்க பார்த்தே ஆகனும்.

திருவானைக்காவல் சிவன் கோயிலும் பெரிய, பழைமையான கோயில். இங்க சிவபெருமான் நிலத்துக்கு கீழ எப்பவும் தண்ணீருக்கு மத்தியில் இருப்பாருங்க. சூப்பரா இருக்கும். அப்புறம் மதியம் 12 மணிக்கு இங்க கோமாதா பூஜை ஒன்னு செய்வாங்க, ஐயர் புடவை கட்டிட்டு வந்து செய்வாருங்க. நமக்கு இது பத்தி மேம்போக்காதாங்க தெரியும்.

உறையூர் வெக்காளி அம்மன் கோயில் (அம்மன் மேற்கூரையின்றி வெட்டவெளியில் இருப்பாள்), பஞ்சவர்ணசுவாமி கோயில்
போன்ற கோயில்களும் நல்லா இருக்கும்ங்க. அப்புறம் சமயபுரம் மாரியம்மன் கோயில், சொல்லி தெரிய வேண்டியதில்லை. அருமையான திருத்தலம், போயி பார்த்துட்டு வாங்க. குணசீலம், திருப்பைஞ்சலி கோயில்களும் பிராமாதனமானவை.

இன்னும் நிறைய கோயில்கள் இருக்குங்க திருச்சியில. யாராவது சொந்தக்காரங்க இருந்தாங்கன்னா, போய் ஒரு பத்து நாள் இருந்து சுத்திப் பாத்துட்டு வாங்க. கோயில்கள் மட்டுமில்லைங்க. முக்கொம்பு சூப்பரான சுற்றுலாத் தளம். கல்லணை பிரமாண்டமா இருக்கும். அதுவும் இப்ப காவிரியில் வேற தண்ணீர் முழுமையா ஓடிக்கிட்டிருக்கு, போய் பாத்தீங்கன்னா அசந்துருவீங்க !

திருச்சியில துணிக்கடைகள் பிரபலம்ங்க. சாரதாஸ், ஆனந்தாஸ், தைலா, சென்னை சில்க்ஸ், பாம்பே டையிங் ஷோரூம்ன்னு சின்னகடை வீதி போனீங்கன்னாலே கூட்டம் அலை மோதும்ங்க. தரமான துணிகளை குறைந்த விலைக்கு வாங்கலாங்க. மலைக்கோட்டை போற வழியிலதான் இவை அனைத்தும் இருக்குதுங்க.

சினிமா தியேட்டர்களுக்கு என்ன குறைச்சலா திருச்சியில ? நிறைய தியேட்டர்கள் இருக்குங்க. ஒரே காம்ப்ளெக்ஸ்ல (மாரீஸ்) 5 தியேட்டர்கள் இருக்குங்க. அப்புறம் ரம்பா, ஊர்வசி, சிப்பி, சோனா, மீனா, காவிரி இன்னும் நிறைய தியேட்டர்கள் ஞாபகம் இல்லைங்க.

நீங்க புதுப்படம் பாக்கணும்ன்னா மேல சொன்ன தியேட்டர்களுக்கு போகலாம், இல்ல செகண்ட் ரவுண்ட் ஓடற படம் பாக்கணும்னா லிட்டில் அருணா, ருக்மணி, ராமகிருஷ்ணா, வெங்கடேசா இப்படி தியேட்டர்கள் இருக்கு. ஆங்கிலப் படங்கள் பார்க்கனுமா, அதுக்கு சிப்பி, பிளாஸா இருக்குங்க. சீன் படம் பாக்கணுமா, முல்லை, கோஹீனூர் இருக்குங்க. இல்ல நீங்க தியேட்டர் போகப் பிடிக்கலையா, விசிடி நிறைய கிடைக்கும்ங்க, அப்புறம் என்ன, ஜமாய்க்க வேண்டியதுதான் !

இது எல்லாத்தையும் விடுங்க. படிப்புக்கு சிறந்த இடம் திருச்சிதாங்க. ஆண்களுக்காக செயிண்ட் ஜோஸப் பள்ளி மற்றும் கல்லூரி, பிசப் ஹீபர் பள்ளி மற்றும் கல்லூரி, நேசனல் கல்லூரி, ஜமால் முகமது கல்லூரி, இ.ஆர் பள்ளிகள் இருக்குங்க. பெண்களுக்காக ஹோலி கிராஸ், இந்திரா காந்தி, எஸ்.ஆர்.சின்னு நிறைய இருக்குங்க. ஓரளவுக்கும் பெரும்பாலான பள்ளிக்கூடங்கள்ள தரமாவே படிப்பு சொல்லித் தராங்க. என்ன ஒன்னு, பெரும்பாலான பள்ளி, கல்லூரிகள் கோ-எட் கிடையாது. அது ஒன்னுதாங்க எனக்கு வருத்தம். இது மட்டுமல்லாமல் கணிப்பொறி படிப்பிற்கான தனியார் கல்விக்கூடங்களும் இருக்குதுங்க.

சொல்ல மறந்துட்டேன் பாருங்க, தரமான மருத்துவ கூடங்கள் (ஆஸ்பிடல்ஸ்) திருச்சியில் நிறைய இருக்குங்க. உறையூர்ல சி.எஸ்.ஐ அப்படின்னு ஒரு ஹாஸ்பிடல் இருக்குங்க. சூப்பரான ஹாஸ்பிடல். தரமான மருத்துவ சிகிச்சை குறைந்த நியாயமான செலவில் கிடைக்கும். அப்புறம் சீ.ஹார்ஸ் பணக்காரங்களுக்கு. கண் மருத்துவமனைகளும் நிறைய. இன்னும் நிறைய நல்ல ஹாஸ்பிடல்ஸ் இருக்குங்க.

ரோடுகள் எல்லாம் ஓரளவுக்கு நல்லா இருக்கும். வன்முறை, ரவுடித்தனம் அதிகம் இருக்காதுங்க. நல்ல ஊரு, சுத்தமான காத்து, காவிரித் தண்ணி, குறைந்த விலைவாசி (மற்ற தமிழக நகரங்களை ஒப்பிட்டால்), அமைதியான, மற்றவர்களுக்கு உதவும் மனப்பான்மையுடைய மக்கள் இதெல்லாம்தாங்க திருச்சி.

இப்ப சொல்லுங்க நீங்களே, திருச்சி பூலோக சொர்க்கம்தானே ? இதுவரைக்கும் திருச்சிக்கு போனதில்லைன்னா உடனே போயிட்டு வந்துருங்க. உங்களுக்கும் திருச்சியை புடிச்சுடுச்சுன்னா '+'ல்ல ஒரு குத்து விட்டுட்டு போங்களேன், புண்ணியமாப் போவும் !

இந்திய கிரிக்கெட் அணியின் (திடீர்) முன்னேற்றம்

போன தொடர் வரை அடிமேல் அடி வாங்கி சாதனை படைத்து வந்த இந்திய அணி திடீரென்று வீறு கொண்டு எழுந்து, தற்போது நடக்கும் ஒருநாள் தொடரில் இலங்கை அணியை துவைத்து எடுக்கின்றது. இதற்கான காரணங்கள் என்ன என்று செய்தித் தாள்களும், தொலைக்காட்சிகளும் போட்டி போட்டுக் கொண்டு அலசி ஆராய்கின்றன. நாமும் நம் பங்குக்கு ஏதாவது ஆராய்ந்து வைப்போம்!

ஓர் அணியின் திறமையை ஒரு தொடரை வைத்து மதிப்பிட்டு விட முடியாது என்றாலும் இந்திய அணியின் தற்போதைய முன்னேற்றத்துக்கு பின்வருவனவற்றை காரணமாகச் சொல்லலாம்.

• டிராவிட் - சேப்பல் கூட்டணியின் அணித்தலைமை
• இளைஞர்களின் வரவும், இதனால் அணிக்கு கிடைத்த புத்துணர்ச்சியும்
• எதிர்பாராத ஆட்ட வியூகங்கள்
• ஒரு திட்டம் தோற்கும்போது, மாற்றுத்திட்டம் வைத்திருப்பது
• அணி வீரர்களிடம் காணப்படும் போராட்ட குணம் மற்றும் தன்னம்பிக்கை
• முன்னின்று வழிநடத்தும் டிராவிட்டின் பொறுப்பான அணுகுமுறை

இருந்தாலும் இவை அனைத்தும் இத்தொடரோடு முடிந்து விடுமா அல்லது இந்திய அணி தொடர்ந்து ஜொலிக்குமா என்பதை காலம்தான் சொல்ல வேண்டும். சவுரவ் கங்குலி அணிக்கு திரும்புவாரா, சேவக் மீண்டும் விலாசுவாரா என்று நிறைய கேள்விகளுக்கும் கொஞ்ச நாட்களில் பதில் தெரிய வரும். அதுவரைக்கும் வேறெதையும் பற்றி கவலைப் படாமல் நமது அணியின் சிறப்பான ஆட்டத்தை கண்டுகளிக்க நான் தயார், நீங்கள் தயாரா?

கிரிக்கெட்டுக்கும் தீபாவளிக்கும் என்ன தொடர்பு ?

தீபாவளி நல்வாழ்த்துக்கள்

நாளை தீபாவளிக்காக ஊருக்கு கிளம்புகிறேன். எங்கள் ஊரில் இணைய வசதிகள் இல்லாததால், அடுத்த பத்து நாட்களுக்கு வலைப்பதிவு பக்கம் வர இயலாது. எனவே நண்பர்கள் அனைவருக்கும் தீபாவளி நல்வாழ்த்துக்கள் !

()

சூப்பர் (டூபாக்கூர்) சீரிஸ் கிரிக்கெட்

ஆஸ்திரேலியா அணிக்கும் மற்ற அனைத்து நாடுகளின் சிறந்த கிரிக்கெட் வீரர்கள் கொண்ட உலக அணிக்கும் சூப்பர் சீரிஸ் கிரிக்கெட் தொடர் கடந்த வாரம் நடந்து முடிந்தது. ஏற்கனவே ஒருநாள் போட்டிகளில் உலக அணியை அடித்து துவைத்த ஆஸ்திரேலியா, டெஸ்ட் போட்டியிலும் உலக அணியை துவைத்து காயப் போட்டது. இத்தனைக்கும் உலகின் சிறந்த வீரர்களை கொண்டது உலக அணி. டிராவிட், லாரா, இன்சாமம், காலிஸ், பிளிண்டாப் போன்ற சிறந்த வீரர்கள் இருந்தும் அடிமேல் அடி வாங்கியது உலக அணி. ஒவ்வொரு போட்டியிலும் படு மோசமாக தோல்வி பெற்று சாதனை படைத்தது. இவ்வுளவு அடி வாங்கயதைப் பற்றி கவலையே படாமல் உலக அணி வீரர்கள் ஷாப்பிங், பிக்னிக், டின்னர் என்று (டூரில் இருந்த போது) பொழுது போக்கி அவரவர் ஊருக்கு சென்று/வந்து 'இது ஒரு சிறந்த அனுபவம்' என்று பேட்டி கொடுக்கின்றனர். இதையெல்லாம் பற்றி கவலைப் படாமல் கிரிக்கெட் ரசிகர்களாகிய நாம் தொடர்ந்து நமது அணியை ஆதரிப்போம் !

()

பின்குறிப்பு : கிரிக்கெட்டுக்கும் தீபாவளிக்கும் தொடர்பு ஏதாவது உள்ளதா என்பதை பற்றி நண்பர்கள் தெரியப் படுத்தலாம். கெட்டவார்த்தையில் திட்டி மின்னஞ்சல் அனுப்ப வேண்டாம்.

கஜினி, தாண்டியா மற்றும் சில கவிதைகள் V 2.0 - Reloaded

மும்பை வாஷி மேகராஜில், நண்பர்களுடன் சென்று 'கஜினி'யையும், கஜினியைப் பார்க்க வந்தவர்களையும் பார்த்தோம். இதோ கஜினி பற்றிய திரைத் துளிகள்.

• 'அன்னியன்' படத்துக்கு ரூ. 85 ஆக இருந்த டிக்கெட் விலை, 'கஜினி' படத்துக்கு ரூ. 100 ஆக எகிறி விட்டது.
• தியேட்டரில் ஒலி அமைப்பு (சவுண்ட் சிஸ்டம்) சரியில்லை.
• படத்தில் பங்குபெற்ற கலைஞர்களின் பெயர் போடும்போது, சூர்யாவை விட அஸினுக்கு அதிக விஸில்கள் கிடைத்தன.
• இடைவேளையில் தின்ற சமோசா சூப்பர், இதற்காகவே இன்னொரு படம் பார்க்கலாம் என்றிருக்கிறேன்.
• படம் இடைவேளைக்கு பிறகு சுவாரசியமாக இல்லை. கிளைமேக்ஸ் ஏமாற்றம்.
• சூர்யா - அஸின் காதல் காட்சிகள் பிரமாதம், சூர்யா கலக்கியிருக்கிறார். நயன்தாராவைப் பற்றி சொல்ல எதுவுமில்லை.
• 'சுற்றும் விழிச் சுடரே' மற்றும் 'ஒரு மாலை இளவெயில் நேரம்' பாடல்கள் அருமை. மற்ற பாடல்கள் வீண்.

நயன்தாராவை பற்றி எதுவும் சொல்லாததற்கு நிறைய நண்பர்கள் வருத்தப் பட்டனர். அவர்களுக்காக மேலும் சில திரைத் துளிகள் Version 2.0 வில் சேர்க்கப் பட்டன.

• ஒரு மருத்துவக் கல்லூரி மாணவியை எப்படியெல்லாம் காட்டக் கூடாதோ, அப்படியெல்லாம் காட்டியிருக்கிறார் இயக்குனர்.
• கிளைமேக்ஸ் காட்சியில் வரும் மழையில் நயன்தாராவை நனையவிட்டு கவர்ச்சி விருந்து படைத்துள்ளார்கள்.
• சந்திரமுகி, ஐயா போன்ற படங்களில் வந்து நாகரீகமாக நடித்த நயன்தாராவை வெறும் கவர்ச்சி பொம்மையாக பயன்படுத்தியிருப்பது வருந்தத் தக்கது.
  

மொத்தத்தில் 'கஜினி' வெற்றியா, தோல்வியா என்று சரியாகத் தெரியவில்லை. ஆனால் இது இன்னொரு 'ரமணா' இல்லை என்று மட்டும் தெளிவாகத் தெரிந்தது.

தினமலரில் என் பெயர் வந்ததை மும்பையில் பாதி பேருக்கும், சொந்த ஊரான டீ. பழூரில் எல்லோருக்கும் தம்பட்டம் அடித்தாயிற்று. அலுவலகத்தில் சக ஊழியர்களும், நண்பர்களும் சற்று மரியாதையாக பார்க்கின்றார்கள். முடிந்தால் சன் டீவியில் ஒரு பேட்டி கொடுத்து விடலாமென்று இருக்கிறேன். பார்க்கலாம், சன் டீவிக்கு சீரியில்கள் நடுவே என் பேட்டியை ஒளிபரப்ப நேரமிருக்குமா, என்று.

நவராத்திரி விழாவை மும்பை மக்கள் 'தாண்டியா' நடனமாடி கொண்டாடி வருகின்றனர். எங்கள் பகுதியிலும் 'தாண்டியா' ஆடிவரும் இடத்திற்கு சென்றிருந்தேன். லேட்டஸ்ட் ஹிந்தி பாடல்களை (தாண்டியாவிற்கான பிரத்யோகமான இசையும் உண்டு) லோக்கல் ஆர்கெஸ்ட்ரா குழுவினர் பாட, மக்கள் படு உற்சாகமாக ஆடிக் கொண்டிருந்தனர். M டீவி, V டீவி சானல்களைத் தாண்டி இளைஞர்களும், மெகா சீரியல்களைத் தாண்டி பெண்களும் வந்திருந்ததை வரவேற்க வேண்டும். நவராத்திரி விழாவின் பத்து நாட்களும், கோலாகலமாக மக்கள் பொது இடங்களில் கூடி விழாவைக் கொண்டாடுகின்றனர்.

கவிதை - 1 (உருவாக்கம் : நண்பர் அரவிந்த்)

தீக்குச்சி தீப்பெட்டியிடம் கேட்டதாம்,
உரசிக்கொள்வது நாமாக இருப்பினும்
பற்றிக்கொள்வது நான் மட்டுமா?

கவிதை - 2 (உருவாக்கம் : சோம்பேறி பையன்)

கைத்தொலைபேசியில் வரும் அழைப்புகளும்
சிற்சிறு (SMS) செய்திகளும்
கணினியில் வரும் மின்னஞ்சல்களும்
ஞாபகப் படுத்தா விட்டாலும்
எங்காவது உன் பெயரை பார்க்கும் போதும்
உனக்கு பிடித்த பாடலை கேட்கும் போதும்
மூழ்குகிறேன், உன் நினைவுகளால்!

என் பேரும் தினமலர்ல வந்துருச்சே...

தினமலர் 24 செப்டம்பர் செய்தித் தாளில் 'அறிவியல் ஆயிரம்' பகுதியில் சோம்பேறி பையனின் வலைப்பதிவைப் பற்றிய செய்திவந்துள்ளது. தொடர்பு சுட்டி http://dinamalar.com/2005sep24/flash.asp

நண்பர் 'கார்த்திக்' தொலைபேசியில் கூறியபோது நம்ப வில்லை. இணையத்தில் சென்று பார்த்தவுடன் நண்பர்கள், உறவினர்கள் அனைவருக்கும் மின்னஞ்சல் அனுப்பி வைத்தேன். பல வாழ்த்துகளும், சில வசவுகளும் வந்தன. இரண்டு மணி நேரத்திற்கு ஒரே மஜாவாக இருந்தது. 'சுற்றும் விழிச் சுடரே..' என்று ஜீன்ஸ், கூலிங் கிளாஸ் போட்டுக் கொண்டு 'கஜினி' அஸினோடு பாட்டு பாடுவது போல் கனா கண்டேன்.

தினமலருக்கு நன்றிகள் பல. கேர்ள் ப்ரண்ட்ஸிடம் 'பெரிய எழுத்தாளராக்கும்' என்று தைரியமாக கதை விட ஆதாரம் கிடைத்து விட்டது. ஊருக்கு போன் செய்து, 24ம் தேதியிட்ட தினமலரை எடுத்து வைக்க சொல்ல வேண்டும். பெரிய கண்ணாடி ப்ரேம் போட்டு, ஹாலில் மாட்டலாம் என்று எண்ணம்.

இது சம்பந்தமான கோ. கணெஷின் வலைப்பதிவைப் படித்தேன். அவரது வலைப்பதிவைப் பற்றியும் மற்றும் வேறு சில நண்பர்களின் வலைப் பதிவுகளைப் பற்றியும் தினமலர் செய்தி வெளியிட்டுள்ளது. வலைப் பதிவுகளைப் பற்றி செய்திகளை தொடர்ந்து வெளியிட்டு வருகிறது, அறிவியல் ஆயிரத்தை தினமும் கவனியுங்கள், நண்பர்களே.

ஆக மொத்தம், வலைப் பதிவர்களுக்கு பத்திரிக்கைகள் அங்கீகாரம் அளிக்க ஆரம்பித்துள்ள போக்கு மகிழ்ச்சியை அளித்துள்ளது. இதனால் வலைப்பதிவர்களின் பொறுப்பும் கூடியுள்ளது. வித்தியாசமான, உபயோகமான தகவல்களை அளிக்க வேண்டும். தனி மனித துவேஷம் கூடாது. கிண்டலிலும் பிறர் மனம் புண்படாதவாறு எழுத வேண்டும். பார்ப்போம், கடைப் பிடிக்க முடிகிறதா என்று!

இன்றைய டுபாக்கூர் கவிதை

மழைத் துளிகளின் நடுவே
சூரியன் தேடி அலைந்த
போதுதான் பார்த்தேன்,
சூரியன் உன்
செல்போனில் FM-ஆக இருப்பதை!

பின் குறிப்பு : இந்த கவிதையைப் பாராட்டி பின்னூட்டம் போடும் நண்பர்களில் ஒருவருக்கு குலுக்கல் முறையில் பிளாஸ்டிக் குடம் பரிசளிக்கப் படும்!

என் பெயர் 'ட்வெண்ட்டி செகண்ட்ஸ்' V 2.0 - Reloaded

இந்திய கிரிக்கெட் கேப்டன் கங்குலிக்கும் ட்வெண்ட்டி செகண்ட்ஸிற்கும் என்ன சம்பந்தம் என்பதை கடைசி பாராவில் கண்டு பிடிக்கலாம். "ட்வெண்ட்டி செகண்ட்ஸ், எப்படிய்யா இருக்க?" என்று நண்பரிடமிருந்து எனக்கு வந்த ஓரு தொலைபேசி அழைப்பே இந்த பதிவுக்கு காரணம்.

அலுவலகத்தில் முன்பிருந்த இடத்திலிருந்து புதிய இடத்திற்கு மாறி விட்டேன். அதாவது இடம் எண் 1W59-ல் இருந்து 1W41-க்கு மாறி விட்டேன். 1W41-ல் 4+1 = 5. எண் கணிதம்(நியூமராலஜி) எல்லாம் பார்த்ததில் சாதகமாக ஒன்றும் இல்லாததால், எண் கணிதம் எல்லாம் டுபாக்கூர் என்ற முடிவுக்கு வந்து விட்டேன். இந்த இட மாற்றத்தால், இரண்டு மூன்று நாட்களாக வேலை நிறைய இருந்ததால் வலைப்பதிவு பக்கம் வர முடியவில்லை.

கங்குலி - சேப்பல் விவகாரம் படு ஜோராக போய்க் கொண்டிருக்கிறது. ஒவ்வொரு நாளும் புதிய புதிய செய்திகள் இது தொடர்பாக வெளிவருகின்றன. சேப்பல் கிரிக்கெட் போர்டுக்கு அனுப்பியதாகக் கூறப்படும் மின்னஞ்சலை நண்பர் ஒருவர் எனக்கு முன் செலுத்தினார்(Forward). அதில் உள்ள விஷயங்களைப் படித்துப் பார்த்தால் தலை சுற்றுகிறது. இந்திய கிரிக்கெட் வாழ்க!

சென்ற முறை தீபாவளிக்கு, ஊருக்கு புகைவண்டியில் நண்பர்களுடன் சென்றேன். மும்பையிலிருந்து சென்னைக்கு 24 மணிநேரப் பயணம் (சென்னை - தாதர் எக்ஸ்பிரஸ்). எங்களது குழுவில் 13 பேர். பொழுது போவதற்காக 'பாட்டுக்கு பாட்டு' (அந்தாக்ஸரி) விளையாடினோம். கர்ண கொடூரமாக பாடி புகைவண்டியயே கதிகலங்க வைத்ததில், சென்னை வருவதற்குள் மிகவும் பிரபலமாகி விட்டேன்!

'பாட்டுக்கு பாட்டு' போதாதென்று 'சைகை மொழி' (Dumb Charades) வேறு விளையாடினோம். ஆடுபவர்கள் இரு குழுவாகப் பிரிந்து கொள்ள வேண்டும். குழுவிலுள்ள ஒருவருக்கு மற்றொரு குழு ரகசியமாக ஓர் திரைப்படத்தின் பெயரைச் சொல்லும். அவர் சைகை மூலமாக அவர் குழுவிலுள்ள மற்றவர்களுக்கு படத்தின் பெயரை புரிவிக்க வேண்டும். புரிந்து கொண்டு சரியாக படத்தின் பெயரைச் சொன்னால் ஒரு பாயிண்ட் (மதிப்பெண்) கிடைக்கும். பிறகு இந்த குழு சொல்ல மற்றொரு குழு கண்டுபிடிக்கும்.

சிக்கலான சில விதிமுறைகளும் உண்டு. வாயசைக்கக் கூடாது. எழுத்துக்களை சைகை முறையில் காண்பிக்கக் கூடாது. இந்த விளையாட்டில்தான் நான் சலம்பிக் கொண்டிருந்தேன். எங்கள் குழுவில் வேண்டுமென்றே 'குலே பகவாலி' போன்ற பழைய புரிவிக்க கடினமான திரைப்படங்களை கொடுத்துக் கொண்டிருந்தோம். எதிரணி கேள்விப் பட்டிராத ஆங்கில திரைப்படங்களை கொடுத்துக்கொண்டிருந்தது.

ஒருமுறை எதிரணி 'Raiders of the Lost Ark' என்ற ஆங்கிலப் படத்தை என்னிடம் கூறி எனது அணிக்கு சைகையில் புரிவிக்ககூறினர். நமக்கு தமிழே தடுமாறும் இதில் ஆங்கிலம் வேறா என்று நொந்து கொண்டே, எனது அணிக்கு இந்த படத்தை புரிவிக்கமுயற்சி செய்தேன். இதில் 'Raiders' மற்றும் 'Lost' வார்த்தைகளை புரிவித்து விட்டேன். ஆனால் 'Ark' என்பதை புரிவிக்க அரை மணி நேரம் போராடினேன். வில் மாதிரியெல்லாம் சைகை செய்தேன். அணியிலுள்ளவர்களுக்கு புரிய வில்லை.

அப்போது எதிரணியைச் சேர்ந்த நண்பி ஒருவர் 'அரக்கோணம்' வந்துருச்சிடா என்றார் (புகைவண்டி சென்னையை நெருங்கிக் கொண்டிருந்தது). உடனே அந்த வார்த்தையை சுட்டிக்காட்டி அதிலிருந்து 'Ark' என்ற வார்த்தையை எடுத்தோம். இப்படி அரக்கோணத்திலிருந்து 'Ark' எடுத்ததற்காக எனக்கு ஒரு விருது கொடுத்தால் நன்றாயிருக்கும்.


இந்த விளையாட்டில்தான் எதிரணியிடம் சவால் விட்டோம் / விட்டேன், "எந்த படப்பெயரை வேண்டுமானாலும் கூறுங்கள், 20 செகண்ட்ஸில் கண்டு பிடிக்கிறோம்". ஒவ்வொரு முறை ஆடும் போது, கை சொடுக்கிக் கொண்டே '20 செகண்ட்ஸ்தான், முடிக்கிறோம்' என்று கூறியதால் எனக்கு 'ட்வெண்ட்டி செகண்ட்ஸ்' என்று நண்பர்கள் பெயர் வைத்து விட்டார்கள். இப்போதும் நண்பர்களின் கைத்தொலைபேசியில் (Cell phone) பார்த்தால் எனது கைத்தொலைபேசி எண் 'ட்வெண்ட்டி செகண்ட்ஸ்' என்றே சேமிக்கப் பட்டிருக்கும்!

இந்த 'ட்வெண்ட்டி செகண்ட்ஸ்' என்ற பெயர் நம்ம கிரிக்கெட் கேப்டன் 'கங்குலி'க்கும் பொருந்தும். ஏனென்றால் நம்ம தலைவர் இப்ப எல்லாம் பேட்டிங் பிடிக்கப் போனால் 'ட்வெண்ட்டி செகண்ட்ஸ்தான்' அதற்கு மேல் நிற்பதில்லை, அவுட்டாகி டிரஸ்ஸிங் ரூமுக்கு ஓடி வந்து ஜூஸ் குடிக்கிறார். அதனால் கங்குலிதான் தற்போதைக்கு 'ட்வெண்ட்டி செகண்ட்ஸ்' ! என்ன, நீங்களும் ஒத்துக் கொள்கிறீர்கள்தானே?

இந்த வாரக் கவிதை (கவிதைக்கு சொந்தக்காரர் நண்பர் அரவிந்த்)

செருப்பு

பாதங்களைக் காக்கும்
கடவுளுக்கு இடம்
கோயிலுக்கு வெளியில் !

ஸிம்பாப்வே கிரிக்கெட் அணி கலைப்பு

சற்றுமுன் கிடைத்த தகவல். கிரிக்கெட் ரசிகர்களுக்கு ஓர் அதிர்ச்சி செய்தி. ஸிம்பாப்வே கிரிக்கெட் அணி மொத்தமும், நடந்து கொண்டிருக்கும் டெஸ்ட் தொடர் முடிந்ததும் கலைக்கப் பட உள்ளது. வருங்காலத்தில் கிரிக்கெட் என்ற சொல்லே ஸிம்பாப்வேயில் இருக்காது. ஸிம்பாப்வே கிரிக்கெட் கூட்டமைப்பும் (ZCU) இத்துடன் கலைக்கப் படுகிறது. ஸிம்பாப்வே அணியின் கேப்டன் 'தைபு'வும், மூத்த வீரர் 'ஸ்டீரிக்'கும், இது குறித்து கேட்கப் பட்ட கேள்விக்கு பதிலளிக்க மறுத்து விட்டனர். ஸிம்பாப்வே நாட்டின் தலைவர் (பிரசிடண்ட்) 'ராபர்ட் முகபே' இது குறித்து வெளியிட்டுள்ள அறிக்கையில் "இந்த நாள் ஸிம்பாப்வே கிரிக்கெட்டிற்கு ஒரு சோகமான, மறக்க முடியாத நாள்" என்று குறிப்பிட்டு உள்ளார். இதற்கான காரணத்தை கேட்கையில் அவர் கூறியதாவது "இது ஸிம்பாப்வே நாட்டிற்கு மிகப்பெரிய இழப்பு, கிரிக்கெட் அணி மட்டுமில்லாமல் ஒட்டுமொத்த தேசமும் இதற்காக வேதனைப் படுகிறது. ஸிம்பாப்வே மக்கள் மனமொடிந்து போயுள்ளனர். வரிசையாக எல்லா அணிகளிடமும் மோசமாகத் தோற்றாலும், நாங்கள் தொடர்ந்து கிரிக்கெட் விளையாடிக் கொண்டு இருந்திருப்போம், ஆனால் இந்திய அணியின் கேப்டன் 'கங்குலி' எங்களுக்கு எதிராக சதம் (செஞ்சுரி) அடித்து அதிர்ச்சிக்கு உள்ளாக்கியதை, எங்களால் தாங்க இயலவில்லை! இதை மட்டுமே இப்போது, என்னால் கூற இயலும்."

ஆதாரம் : ரியுட்டர்ஸ் செய்தி நிறுவனம்

பின் குறிப்பு : இந்த தகவல் எனக்கு மின்னஞ்சலில் முன்செலுத்தப்(Forward) பட்டது. உபயம் : நண்பர் அருண்.

சானியா மிர்சாவும், பனி விழும் மலர் வனமும்

இந்த மாதிரி குண்டக்க, மண்டக்க என்று தலைப்பு வைப்பதின் ஒரே நோக்கம், தலைப்பு வித்தியாசமாய் இருக்கிறதே என்றாவது நிறைய பேர் வந்து பார்ப்பார்கள் அல்லவா? இருந்தாலும் தலைப்பை நியாயப் படுத்தும் வகையில் அது சம்பந்தமாய் ஏதாவது எழுதி விடுவேன், நம்புங்கள்!

வலைப்பதிவு துவங்கும் போது, என்ன பெயர் வைக்கலாம் என்று சன் டிவியில் இரவு 11 மணிக்கு வரும் 'புத்தம் புதுசு' பார்த்துக் கொண்டே யோசித்தேன். 'பனி விழும் மலர் வனம்', 'வசந்த முல்லை', 'வெண்ணிலா' என்று நிறைய பெயர்களை யோசித்தேன். இந்த மாதிரியெல்லாம் இலக்கியத் தரமாக பெயர் வைத்தால், நமது இமேஜிற்கு ஒத்து வராது என்று 'சோம்பேறி பையனின் எண்ணங்கள்' என்று வைத்து விட்டேன்!

பெருவாரியான இந்திய விளையாட்டு ரசிகர்களைப் போலவே, எனக்கும் கிரிக்கெட் என்றால் ரொம்ப பிடிக்கும். இருந்தாலும் சமீப காலமாக இந்திய அணி விளையாடுவதைப் பார்த்தால், கருடபுராணத்தில் இம்மாதிரி விளையாடுவதற்கு ஏதாவது தண்டனை இருக்குமா என்று தேடத் தோன்றுகிறது. இப்போது கூட இந்தியா ஸிம்பாப்வேயில் தடவித் தடவிதான் ஆடிக் கொண்டிருக்கிறார்கள், பேசாமல் டென்னிஸுக்கு மாறிவிடலாம என்று யோசித்துக் கொண்டிருக்கிறேன். சானியா மிர்சா வேறு அழகாய் இருக்கிறார். சர்வதேசப் பட்டியலில் 34வது இடத்திற்கு வந்து, கலக்கிக் கொண்டிருக்கிறார். இன்னும் கொஞ்ச நாளில் என் கனவில் வந்து 'ராரா..' என்று சந்திரமுகி ஜோதிகா போல் ஆடினாலும் ஆடுவார் என்று பட்சி சொல்லுகிறது!

சென்ற பதிவில் குறிப்பிட்ட பஞ்சாப் பைங்கிளியிடம் இன்னும் கிரிட்டிங்ஸ் கார்டு கொடுக்க வில்லை. ஒருவேளை ஒத்து வராவிட்டால், அடுத்த விண்ணப்பம் சானியா மிர்சாவிடம் போடலாம் என்று உத்தேசம். ஆந்திரா அல்லுடுவாகி விடலாம். யாராவது அவரது மின்னஞ்சல் முகவரி வைத்திருந்தால் கொடுங்களேன், முயற்சி செய்கிறேன். ஓர் தமிழ் வலைப்பதிவு எழுத்தாளனுக்கு இத்தனை சோதனையா? 'பாரடி பராசக்தி' என்று பாரதி ரேஞ்சில் கவிதை பாட நாக்கு துடிக்கிறது!

சென்ற வாரம் நண்பர் ஒருவரின் இல்லத்திற்கு சென்றிருந்தேன். நண்பர் தமிழ்நாட்டில் கும்பகோணத்தைச் சேர்ந்தவர். அவருக்கு சமீபத்தில் (5 மாதம் முன்பு) பெண் குழந்தை பிறந்து , இப்போதுதான் மும்பைக்கு அழைத்து வந்துள்ளார். அந்த குழந்தையைப் பார்க்கச் சென்றேன். போனவன் சும்மா இல்லாமல் தமிழில் வாழ்த்துப்பா ஒன்றையும் (நாந்தான் பெரிய கவிஞனாச்சே...) எழுதி எடுத்துச் சென்றேன்.

மகாமகக் கரையில் பிறந்து
மகாராஷ்டிரா மண்ணை மிதித்திருக்கும்
மலரே, வருக !

இதே அந்த வாழ்த்துப்பாவின் ஆரம்பம். இந்த ஸ்டைலில் இரண்டு பக்கத்திற்கு எழுதி இருந்தேன். முழு கவிதையையும் இங்கே வெளியிட்டால் நீங்கள் ஆல்ட் F4 போட்டு விடுவீர்கள் என்று எனக்குத் தெரியும்.

வாழ்த்துப்பா கஷ்டப்பட்டு சொந்தமாக எழுதியது என்பதால் அதன் முதல் இரண்டு மூன்று அடிகளை மட்டும் குழந்தையின் காதில் வேதம் ஓதுவது போல் ஓதினேன். அப்போது அழ ஆரம்பித்த குழந்தைதான், இன்னும் அழுகையை நிறுத்தவில்லையாம். நண்பர் இப்போதெல்லாம் தள்ளி நின்றே என்னை நலம் விசாரிக்கிறார். ஆதலால் தற்காலிகமாக கவிதை எழுதுவதை நிறுத்தி வைத்துள்ளேன். உங்கள் நல்ல நேரம், பிழைத்தீர்கள்!

இங்கிலாந்து அட்டகாசமாய் ஆடி 'ஆஷஸ்' கிரிக்கெட் தொடரை, 18 ஆண்டுகளுக்குப் பிறகு பெற்றுள்ளனர். லண்டனில் பெரிய வெற்றி ஊர்வலமெல்லாம் கூட நடந்தது. இந்தியா ஸிம்பாப்வேயுடன் டெஸ்ட் தொடரை வென்று வந்தால், இங்கே கூட இந்த மாதிரி வெற்றி பேரணியெல்லாம் நடத்தலாம், ஏனென்றால் தற்போதைய நிலைமைக்கு ஸிம்பாப்வேயை வென்றாலே, இந்தியாவுக்கு பெரிய சாதனைதான்!

என்னமோ போங்க, நானும் ஒவ்வொரு கிரிக்கெட் தொடரையும் விழுந்து விழுந்து பார்க்கிறேன். இந்தியா கோப்பை வாங்கறதத்தான் பார்க்க முடியவில்லை. இப்படி தொடர்ந்து பார்த்து, இந்திய கிரிக்கெட்டை ஆதரிக்கின்ற எனக்கு, யாராவது விருது கொடுத்தா தேவலை!

* அண்டங்காக்கா கொண்டக்காரி *

போன வாரம் வலைப்பதிவை தமிழ்மணத்தில் சேர்த்ததும் ஆபிஸில் இருக்கும் நண்பர்களுக்கு போன் செய்து தெரிவித்தேன். ஆகா.. நல்ல காரியம் செய்தாய், நாங்கள் படும் கஷ்டத்தை (எனது பதிவுகளை படிப்பதை) தமிழ் கூறும் (வலைப்பதிவர்) நல்லுலகமும் படட்டும் என்று ஆசி வழங்கினார்கள். போற்றுவார் போற்றட்டும், புழுதி வாரித் தூற்றுவார் தூற்றட்டும் என்று நோட்பேடை திறந்து இந்த பதிவை எழுத ஆரம்பித்து விட்டேன்.

பதிவு ஆரம்பித்ததைக் கொண்டாட நண்பர்களுக்கு டீ (சத்தியமாக டீ மட்டும்தான்..) வாங்கிக் கொடுத்தது, நன்றாகவே வேலை செய்தது. அப்படியே அரசல் புரசலாக செய்தி பரவி, ஹிந்திக் காரர்கள் கூட வந்து கை கொடுத்தார்கள். பெரிய எழுத்தாளன் நான், கவிதையெல்லாம் கூட எழுதுவேன்(!) என்று அடித்து விட்டதில் பக்கத்து சீட்டு பஞ்சாபி பைங்கிளி 'நைஸ் டு ஸி யு ரைட்டிங் யா..' என்றது. இதற்கு என்ன அர்த்தம் என்று 'ஆர்ச்சிஸ்' கிரிட்டிங் கார்டு (ஐ லவ் யூ என்று ரோஜாப்பூ படம் போட்டிருக்கிறது) வாங்கி யோசித்துக் கொண்டிருக்கிறேன். ராகுகாலம் எமகண்டம் எல்லாம் பார்த்து, சுபயோக சுபதினத்தில் பைங்கிளியிடம் சமர்ப்பிக்க வேண்டும். அடி வாங்காமல் பிழைத்திருந்தால், அடுத்த பதிவை எழுதுகிறேன்.

மூளையை ரொம்ப கசக்கி, நிறைய டீ, தம் எல்லாம் அடித்து ஹைக்கூ கவிதை ஒன்றை உருவாக்கினேன். ஒரிஜினல் ஹைக்கூ கவிஞர்கள் கவிதையைப் பார்க்காமல் உடனடியாக அடுத்த பாரவுக்கு செல்லவும்.

நண்பனின் காதலி
அழகாய் இருப்பதை பார்த்ததும்
நட்பை மறந்தது மனசு...

இந்த ஹைக்கூவை படித்துவிட்டு பாராட்டி பின்னூட்டம் போடும் நண்பர்களுக்கு சீக்கிரம் கேர்ள் பிரண்டோ / பாய் பிரண்டோ கிடைக்க மும்பை சித்தி விநாயகரிடம் வேண்டிக் கொள்ளலாம் என முடிவு செய்திருக்கிறேன். திருமணமானவர்கள் முயற்சி செய்யவேண்டாம்.

தீபாவளிக்கு ஊருக்குப் போக டிரெயின் டிக்கெட் முன்பதிவு செய்து விட்டேன். இன்னும் 40 நாட்களே உள்ளன, ஊருக்கு போக. ஊருக்கு போவது என்றாலே ஒரே ஜாலிதான். நல்ல சாப்பாடு, நல்ல தூக்கம் என்று பொழுது போகும். மிச்சமிருக்கும் நேரத்தில் நண்பர்களிடம் மும்பையை பற்றி நிறைய கதை விட வேண்டும். என்னிடம் ஆதிகால மொபைல் போன் ஒன்று (சின்ன ஆன்ட்டனா கூட இருக்கும், ஆபிஸில் கொடுத்த போன்) உள்ளது. எங்க ஊர் அப்பாவியான நல்ல மக்கள் நிறைய பேர் இருக்கிற ஊர். அங்கே இந்த மொபைல் போனை எடுத்துட்டு போய், கிடைக்கிற கால்வாசி சிக்னலில் நாலு மிஸ்கால், நாலு மெஸெஜ் அனுப்புற சுகமே தனிதான்... அப்புறம் நமக்கு தெரிஞ்ச ஆங்கில வார்த்தையெல்லாம் மொபைல்ல பேசறப்ப எடுத்து விடனும்.. 'துரை இங்கிலிபீஸ் எல்லாம் பேசுது'ன்னு கோவை சரளா ஒரு படத்தில் சொல்வாரே, அப்படி சொல்லி வியப்பார்கள் எனது ஊர் மக்கள், ரொம்ப வெள்ளந்தியானவர்கள் !

போன முறை ஊருக்கு ப்ளைட்டில் போனேன், ப்ளைட்டில் ஏறியவுடன் ஒரே மஜாவாக இருந்தது. என்னை, சார் என்று ரொம்ப மரியாதையாக கூப்பிட்ட போது கூச்சமாக இருந்தது. மூன்று முறை என்னை திட்டிக் கொண்டே (எந்த ஊருய்யா உனக்கு) கூல்ட்ரிங்க்ஸ் கொடுத்தார்கள். என்ன ஒரே குறை, ப்ளைட் பறக்கும்போது, நல்லா காற்று வருமென்று சைடு ஜன்னலை திறந்து விட சொன்னேன், கடைசி வரை திறந்து விடவே இல்லை. குட்டை பாவாடையில் அழகாக இருந்த 'ரீட்டா' என்ற பணிப்பெண்ணை எனக்கு மிகவும் பிடித்திருந்தது (யாரத்தான் பிடிக்காது உனக்கு? - மனசாட்சியின் குரல்). மொபைல் நம்பரோ, இ-மெயில் அட்ரஸோ கேட்கலாம் என நினைத்தேன். ப்ளைட் நின்றவுடன் ஆள் வைத்து அடிப்பார்களோ என்று பயம் வந்ததால், ஜெண்டில்மேன் ஆகி விட்டேன்.

பதிவுகளைப் படித்த நண்பர்கள் ஏன் ஒரே சொந்த கதை, சோகக் கதையாய் எழுதுகிறாய், நிகழ்கால சம்பவங்களை எழுதலாமே என்று கேட்டார்கள். நிகழ்கால சம்பங்களை பிறர் மனம் புண்படாதவாறு விமர்சித்து எழுதுவது கஷ்டம். நான் அறிவுரை கூறும்படியோ, விளையாட்டு விமர்சனத்தையோ, திரைப்பட விமர்சனத்தையோ எழுதினால், நண்பர்கள் ஆல்ட் + F4 போட்டு விட்டு கருடபுராணம் படிக்க போய்விடுவார்கள். என் கடந்த காலத்தை எழுதும்போது, இஷ்டம் போல் கதை விடலாம். ஆதலால் நான் பார்த்த, ரசித்த, அனுபவித்த சம்பவங்களை கொஞ்சம் கற்பனை கலந்து, நகைச்சுவையாய் எழுதலாம் என நினைக்கிறேன். அவ்வப்போது திரைப்படங்களையும், விளையாட்டையும் தொட்டுக் கொள்கிறேன்!

மும்பையில் நண்பர்கள் அவ்வப்போது வாஷி மேகராஜ், முலுண்ட் ஆட்லேப்ஸ் என்று ஆங்கிலப்படம் பார்க்கச் செல்வார்கள், நான் அந்த பக்கமே திரும்பிப் பார்க்க மாட்டேன். போய் பார்த்தாலும் புரியாதென்பதே காரணம். நான் பார்த்து புரிந்து கொண்ட ஒரே ஆங்கிலப் படம் 'டைட்டானிக்' தான். அது கூட சன் டிவியில் டப் பண்ணிப் போட்ட போது பார்த்த பிறகுதான் புரிந்தது. இந்த 'மேட்ரிக்ஸ்' படத்தை இதுவரைக்கும் 13 தடவை ஸ்டார் மூவிஸ்ஸிலும், ஹச்பிஓவிலும் பார்த்து விட்டேன். ஒரு மண்ணும் புரியவில்லை. ஒருவேளை சன் டிவியில் போடறப்போ புரியுமோ என்னவோ?

பதிவை முடிக்கும் வேளை வந்து விட்டது. என்னடா இவன் 'அண்டங்காக்கா கொண்டக்காரி' என்று தலைப்பை வைத்துவிட்டு அதைப் பற்றி எதுவுமே எழுதவில்லையே என்று அடிக்க வர வேண்டாம். இரண்டாவது பாரவில் பஞ்சாபி பைங்கிளியிடம் கிரிட்டிங்ஸ் கார்டு கொடுக்கப் போகிறேன் என்று சொல்லியிருந்தேன் அல்லவா? ஒருவேளை பார்ட்டி ஒர்க்கவுட் ஆகிவிட்டால், 'ரெமோ' விக்ரம் போல் 'அண்டங்காக்கா கொண்டக்காரி..ரண்டக்க..ரண்டக்க' என்று டூயட் பாடலாம் என்று இருக்கிறேன். ஒர்க்கவுட் ஆகாவிட்டால், 'எங்கே செல்லும் இந்த பாதை...' என்று 'சேது' விக்ரமாகி விட வேண்டியதுதான் !!!

பெய்யெனப் பெய்யும் மழை

இந்த கட்டுரை ஒரு மாதத்திற்கு முன்பு எழுதப் பட்டது. இப்போதுதான் இந்த வலைப் பக்கத்தில் இடம் பெறுகிறது.

26/07/2005 05:12 PM

ஜூலை 26ம் தேதி, மாலை 4 மணிக்கு அலுவலகத்தில் எங்கள் அனைவருக்கும் ஒரு மின்னஞ்சல் வந்தது, கனமழையின் காரணமாக மாலை 4:30 மணிக்கு ஊழியர்கள் வீடு திரும்பலாம் என்று. மும்பையில் வசிப்பவர்களுக்கு மழைக்காலத்தில் இது வழக்கமான ஒன்றுதான். 5 மணிக்கு சக ஊழியர் ஒருவரின் காரில் கிளம்பி விட்டேன். கேட் நம்பர் ஒன்றின் வழியே வெளியே போனால், தண்ணீர் அதிகமாக உள்ளது என்று தகவல் வந்ததால், கேட் நம்பர் மூன்றின் வழியே வெளிவந்தவுடன், மழையின் உக்கிரம் புரிந்து விட்டது. கேட்டின் வலதுபுறம், கார் திரும்பியவுடன் ஒன்றரை அடிக்கு தண்ணீர் இருந்தது. சிறிது நேரத் தயக்கத்திற்கு பிறகு நண்பர் தைரியமாக வெள்ளத்தின் நடுவே காரை செலுத்தினார். கடந்து வந்து, கன்சோலியின் ஜான்'ஸ் பிரிட்ஜ் நிறுத்தத்தில் இறங்கினேன். கன்சோலியின் கூவம் கரை புரண்டு ஒடிக் கொண்டிருந்தது. மழை மிகத் தீவிரமாக பெய்து கொண்டிருந்தது. இன்னும் அரைமணி நேரம் மழை தொடர்ந்து பெய்தால், கன்சோலியில் வெள்ளம் வந்து விடும். யோசிக்கிறேன், என்ன செய்யலாம் ?

28/07/2005 11:01 AM

டைம்ஸ் ஆப் இண்டியா வலைத்தளத்தில் தலைப்புச் செய்தி : மும்பையில் வெள்ளத்தில் சிக்கிக் கொண்ட கார்களில் இருந்து வெளியே வர முடியாமல், 21 பேர் பலி. கார்களில் உள்ள செண்ட்ரல் ஆட்டோ லாக்கிங் சிஸ்டம் மற்றும் பவர் விண்டோ சிஸ்டம் செயலற்றுப் போனதால் வெளியே வர முடிய வில்லை. சில கார்களில் ஏசி சிஸ்டம் வெடித்ததுள்ளன. நினைத்துப் பாருங்கள், காரின் வெளியே வெள்ளம் பெருக்கெடுத்து ஒடுகிறது, கார் கதவுகள் திறக்க முடியவில்லை. கண்ணாடிகளை உடைக்க முடிய வில்லை, மூச்சு முட்டுகிறது. வாழ்வின் கடைசி நொடிகளில், அவர்கள் என்ன வேதனை அனுபவதிருப்பார்கள் ?

26/07/2005 06:30 PM

கன்சோலியில் வீட்டுக்கு சென்ற போது, வீட்டில் மின்சாரம் இல்லை. காலையிலிருந்து மின்சாரம் இல்லை என்று தெரிய வந்தது. உடனே வீட்டிலுள்ள எல்லா வாளிகளிலும் தண்ணீர் பிடித்து வைத்து விட்டு, உடை மாற்றிக் கொண்டு, கோப்பர்கைரனேயில் நண்பர்களின் வீட்டிற்கு சென்று விட்டேன். நடந்து செல்லும் போது, சாலைகளில் ஒரடிக்கு மேல்வெள்ளம் பெருக்கெடுத்து ஒடுகிறது. பேருந்து நிறுத்தங்களில் மக்கள் கூட்டம். சாலைகளில் நிறைய பேர் நடந்து செல்கின்றனர். மழை கனமாக பெய்கிறது. எங்கும் மின்சாரம் இல்லை. பிரளயம் வந்து விட்டதா?

29/07/2005 10:25 AM

டைம்ஸ் ஆப் இண்டியா வலைத்தளத்தில் செய்தி : வெள்ளத்தில் மாட்டிக் கொண்ட மக்களுக்கு/பயணிகளுக்கு சகபயணிகள், அருகாமையில் வசிக்கும் மக்கள் உதவி செய்தனர். பேருந்துகள் வெள்ளத்தில் மாட்டிக் கொண்ட பகுதிகளில் அருகாமையில் வசிக்கும் சிலர் தங்கள் வீடுகளிலிருந்து, பிஸ்கட், பிரட் மற்றும் பழங்களை கொடுத்து உதவியுள்ளனர். சிலர் ஒரு குழுவாக சேர்ந்து கொண்டு, உணவு சமைத்து கொடுத்துள்ளனர். வெள்ளத்தில் சிக்கிக் கொண்ட மக்கள் ஒருவொருக்கருவர் உதவி செய்து, மீண்டு வந்துள்ளனர். மக்களிடையே உதவும் மனப்பான்மை குறைய வில்லை என்பதுமனதுக்கு ஆறுதலளிக்கும் செய்தி.

26/07/2005 10:00 PM

கோப்பர்கைரனே நண்பர்களுடன் சாப்பிடக் கிளம்புகின்றேன். மழை மிகத் தீவிரமாக பெய்கிறது. உணவு விடுதியில் கூட்டம் இல்லை. மின்சாரமும் இல்லை. சாப்பிட்டு விட்டு திரும்பும் போது, குடை பிடித்திருந்தாலும், உடம்பு முழுவதும் நனைந்து விட்டது. திரும்பும் போது நினைத்துக் கொள்கிறேன் : வீடில்லாமல் தெருவில், நடைபாதையில் வசிப்பவர்களுக்கு எவ்வளவு சிரமம் இருக்கும், இம்மாதிரி சூழ்நிலையில் எங்கே போயிருப்பார்கள், அனைவரும் ?

28/07/2005 11:20 AM

மும்பை கோரேகான், அந்தேரி பகுதிகளில் வெள்ளத்தில் சிக்கி 2500 எருமைகள் பலி. எருமைகள் நன்கு நீந்தக் கூடியவைதான். ஆனால் அவைகள் சங்கிலியுடன் பிணைக்கப் பட்டிருந்ததால் தப்பிக்க முடிய வில்லை. எருமைப் பண்ணை உரிமையாளர்கள் ஏன் எருமைகளை விடுவிக்க வில்லை? மனிதர்களின் சுயநலத்திற்கு வாயில்லா ஜீவன்கள் பலியாகி விட்டன. இது தவிர 15000 ஆடுகளும் பலியாகி விட்டதாக கேள்வி.

பின் குறிப்பு

இவை தவிர, இன்னும் பற்பல செய்திகளை நீங்கள் செய்தித் தாள்களின் மூலமும், தொலைக்காட்சியின் மூலமும்அறிந்திருப்பீர்கள். மேற்குறிப்பிட்ட சம்பவங்கள் என்னைப் பாதித்தவைகளில் சில. வெள்ளத்தில் பாதிக்கப்பட்டு எத்தனையோ மக்கள் உயிரிழந்தனர். வீடிழந்தனர். மக்களின் இயல்பு வாழ்க்கை பாதிக்கப் பட்டது. மகாரஷ்டிராவின் மேற்கு பகுதி முழுவதும் பாதிக்கப் பட்டாலும், மாநிலத் தலைநகரான மும்பையின் பாதிப்புக்களுக்கே செய்தி ஊடகங்கள் முக்கியத்துவம் கொடுத்தன. நிறைய நிலச் சரிவுகள் ஏற்பட்டன. மூன்று நாட்களுக்கு மும்பை வெளி உலகத்திலிருந்து துண்டிக்கப் பட்டது.15000 கோடி நஷ்டம் என்று செய்தி வந்துள்ளது. மழை மற்றும் வெள்ளத்தால் மக்கள் பாதிக்கப்பட்ட போது அரசாங்கம் விரைந்து செயல்பட வில்லை என்று கருத்துகள் எழுந்துள்ளன. இப்பேரழிவிற்கு முக்கியமாக பின்வருபவனற்றை காரணமாகக் கூறலாம்.

* மும்பையின் பாதாள சாக்கடைகள் பழமையானவை. டிரைனேஜ் சிஸ்டம் சரியாக இல்லை.

* நீரை உறியும் சக்தியுடைய கடலோர மாங்குரோவ் காடுகள் ஆக்ரமிப்பாளர்களால் அழிக்கப்பட்டு விட்டன.

* கடந்த நூறாண்டு காலத்தில் இல்லாத அளவுக்கு மிக அதிகமான மழைப்பொழிவு.

* விரைந்து செயல்பட முடியாத அரசாங்கம்

* பெருகிவரும் மக்கள் தொகை, அதனால் ஏற்படும் ஆக்ரமிப்புகள்

* நிலச்சரிவு ஏற்படும் அபாயமறிந்தும், முறையற்ற குடியுருப்புகளை ஏற்படுத்தும் மக்களின் அறியாமை மற்றும் ஏழ்மை.

மும்பையில் இயல்பு நிலை திரும்பிக் கொண்டிருக்கிறது. வெகு விரைவில் மும்பை இழந்த உற்சாகத்தைப் பெறக்கூடும். ஆனால் வெள்ளத்தினால் உயிரழந்தவர்களின்/பாதிக்கப் பட்டவர்களின் வீடுகளில் இயல்பு நிலை திரும்புமா? எவ்வாறு அவர்களின் வாழ்க்கைப் பயணம் அமையப் போகிறது ? காலம்தான் பதில் சொல்ல வேண்டும் !

அம்பியும், அன்னியனும்... Version 2.0

இந்த பதிவு ஒரு மாதத்திற்கு முன்பே எழுதப் பட்டது. சற்றே திருத்தப்பட்டு Version 2.0 ஆகவெளிவருகிறது.

இந்த பதிவிற்கு 'Alexandra' என்று தலைப்பு வைத்திருந்தால், இன்னும் பொருத்தமாக இருந்திருக்கும். ஆனால் தமிழ்க் கட்டுரைக்கு ஆங்கிலத்தில் பெயர் வைத்திருக்கிறேன் என்று யாரவது தமிழ்க் குடிதாங்கிகள் போராட்டம் நடத்தினால் என்ன செய்வது என்று நினைத்து, தலைப்பை மாற்றி விட்டேன்.

உங்களுக்கெல்லாம் அலெக்ஸாண்டர் என்றவுடன் என்ன ஞாபகம் வரும்? வரலாற்றில் பல நாடுகளை படையெடுத்து வென்ற மாவீரர் அலெக்ஸாண்டர் ஞாபகத்திற்கு வருவார். அல்லது தமிழகத்தில் காவல்துறை டிஜிபி ஆக இருந்த அலெக்ஸாண்டர் ஞாபகத்திற்கு வரலாம். புரட்சிக் கலைஞர் விஜயகாந்த் நடித்த அலெக்ஸாண்டர் படம் கூட ஞாபகத்திற்கு வரலாம். ஆனால் எனக்கு அலெக்ஸாண்ட(ரா)ர் என்றால், திருச்சி முல்லை தியேட்டர் ஞாபகத்திற்கு வரும். எதற்கென்று புரிய வில்லையென்றால், திருச்சிவாசிகளிடம் விளக்கம் கேட்கவும்.

காலேஜ் படிக்கும் காலத்திலிருந்து, நான் கவிதைகள் எழுதுவதுண்டு.

'பெய்கிறது மழை..
சாய்கிறது தழை..'
என்று ஒரு ரேஞ்சில் புதுக்கவிதைகள் எழுதி குவிப்பேன்.

நோட்டீஸ் பின்பக்கம், பஸ் டிக்கெட், தியேட்டர் டிக்கெட் என்று எது கிடைத்தாலும் எதாவது எழுதி, அதை கவிப்பேரரசு வைரமுத்து ரேஞ்சுக்கு ஒவ்வொரு வரியையும் இரண்டு தடவை சத்தம் போட்டு சொல்லி கருத்து கேட்டதால், உறவினர்கள் எங்கள் வீட்டுக்கு வருவதை குறைத்துக் கொண்டார்கள். பக்கத்து வீட்டுக் காரர்கள் காலி செய்து வேறு ஊர் சென்றார்கள். ஊரில் ஏதாவது வயசான கேஸ் ரொம்ப நாட்களாக இழுத்துக் கொண்டு கிடந்தால், என்னை அழைத்துச் சென்று கவிதை படிக்கச் சொல்வார்கள். மறுநாளே பால்தான். இருந்தும், என் கவிதை தாகம் குறைய வில்லை.

நண்பர்களின் ஊக்குவிப்பால், சில திருக்குறள்களை தற்காலத்திற்கு தக்கவாறு மறுவடிவமைத்தேன். அப்படி மறுவடிவமைத்த ஒரு குறளைப் பாருங்கள்.

குழலினிது யாழினிது என்பர் அவர்தம்
கேர்ள்பிரண்டினை கிஸ் அடிக்காதவர்.

சென்ற முறை எழுதியிருந்ததற்கு நிறைய பதில்கள் வந்தன. ஆயிரக்கணக்கான வாசகர்கள் பாராட்டி எழுதியிருந்தார்கள் என்று ஜல்லியடிக்க விரும்ப வில்லை. சில நண்பர்கள் மெயில் மூலமாகவும், சிலர் போனிலும், வேறு சிலர் நேரிலும் பாரட்டினார்கள்/திட்டினார்கள். கடிதத்தைப் படித்த, ரசித்த, கருத்து தெரிவித்த நண்பர்களுக்கு நன்றி. உங்களுக்கு புரோக்கரேஜ் இல்லாமல் வீடு வாடகைக்கு கிடைக்கவும், Tax Deduct செய்யாத சம்பளம் கிடைக்கவும் இறைவனை பிரார்த்திக்கிறேன்.

திடீரென்று போன வாரம் ஆபிஸில் வேலை செய்ய வேண்டுமென்று சொல்லி விட்டார்கள். பழக்கமில்லாமததால் கஷ்டமாகி விட்டது. பேப்பர் படிக்க முடியாமல், டுபாக்கூர் மெயில்கள் படிக்க முடியாமல், கடலை போட முடியாமல் என்னடா வேலை இது என்று அக்தரைக் கண்ட கங்குலி போலாகி விட்டேன். தினமும் 12 பக்கத்திற்கு Project Status Report மெயிலில் பற்பல தவறுகளுடன் அனுப்பினேன். அதைப் படித்து நொந்து போய், என்னுடைய டீமில் 3 பேர் (Resignation) பேப்பர் போட்டார்கள். மிச்சமிருப்பவர்களை அடுத்த Projectல் பார்த்துக் கொள்வோம் என்று ரிப்போர்ட் அனுப்பவதை நிறுத்தி விட்டேன்.

Email பற்றிய பதிவால் சில சங்கடங்கள் ஏற்பட்டன. தொழில் ரகசியங்களை வெளியிடுகின்றேன் என்று சில நண்பர்கள் குறை கூறினர். அவர்கள் கருத்தும் சரிதான். அவர்களுக்கு சீக்கிரம் Girl Friends கிடைக்கட்டும் அல்லது திருமணமாகட்டும்.

குறை கூறுவது என்றவுடன், எனது காலெஜ் புரபசர் ஞாபகத்துக்கு வருகிறார். கிளாஸ் ரூமில் எப்போதாவது Fan நின்று விடும். உடனே பேன் இல்லாமல் வேர்க்கிறது, பாடம் கவனிக்க முடிய வில்லை என்று புரபசரிடம் புருடா விடுவோம். அவர் 5 நிமிடம் பொறுத்துக் கொள்ளுங்கள் என்பார். எதற்கென்று கேட்டால், 5 நிமிடத்தில் உங்களுக்கு வேர்ப்பது பழகிவிடும் என்பார்.

குறை கூறுவதில் சிலர் கில்லாடிகள் என்றால், சிலர் குறை தீர்ப்பதில் கில்லாடிகள். நான் திருச்சியில் காலெஜ் படிக்கும் காலத்தில் Computer Course சேர்ந்தேன். அங்கே C, C++ என்று கணிணி மொழிகள் கற்று தந்தார்கள் அல்லது கற்றுத்தர முயற்சி செய்தார்கள். Lab Session-னின் போது, 20 லைனில் C Program அடித்தால் 40 Errors காட்டும். உடனே கிரிக்கெட்டில் Third Ampire-க்கு காட்டும் Signal போல் கை காட்டி Lab Assistant-டை கூப்பிடுவோம். அவர் வந்து சரி செய்த பிறகு 52 Errors காட்டும். அவர் இது 'System problem', 'Compiler Malfunction', 'Software corruption' என்று குத்து மதிப்பாக ஏதாவது சொல்வார். அதான் அவரே சொல்லிவிட்டாரே என்று குரூப்பாக கிளம்பி முல்லை தியேட்டருக்கு 'Alexandra' படம் பார்க்க சென்று விடுவோம்.

மறுநாள் சுத்தமாக குளித்து வந்து, அதே புரோகிராமை ஆராய்வோம். சா-பூ-த்ரீ போட்டு நான்கைந்து கமாக்களை எடுத்து Compile செய்தால், 45 Errors காட்டும். அப்போது சீனு என்ற புத்திசாலி எங்கள் செட்டில் இருந்தான். அவனைக் கூப்பிட்டு காண்பித்தால், 3 நிமிடத்தில் எல்லா Error-களையும் எடுத்து விடுவான். என்னவென்று பார்த்தால், தலைவர் Error வரும் Lines எல்லாவற்றையும் Delete செய்து விடுகிறார். Compile செய்தால் 0 Errors என்று வரும். Run செய்தால் System shutdown ஆகி, corrupt ஆகி விடும்.

இப்படி எனக்கும் கம்பியூட்டருக்கும், ஐய்வஸ்ர்யா ராய் - சல்மான் கான் போல் பொருத்தம் இருந்தது. எப்படியோ அடித்துப் பிடித்து காலேஜ் முடித்து ஹைதராபாத் ஒடி வந்து விட்டேன். வேலைக்கு வந்த பிறகு கொஞ்சம் பொறுப்பு வந்து C, Oracle கற்றுக் கொண்டேன்.

சமீபத்தில் 'அந்நியன்' படம் பார்த்தேன். அதில் வரும் விக்ரம் போல எனக்கு ஒரு நண்பர் இருக்கிறார். சாதாரணமாக 'அம்பி' விக்ரம் போல் சாதுவாக இருப்பார். சாப்பிடும் போது 'அந்நியன்' ஆகி விடுவார். தன் தட்டில் இருப்பது மட்டுமல்லாமல், பக்கத்து தட்டையும் ஒரு கை பார்த்து விடுவார். நானே வாழ்க்கை வெறுத்துப் போய், சாதம் சாப்பிடப் பிடிக்காமல், ரவா தோசை வாங்கி வருவேன். அதில் முக்கால் தோசை பிடுங்கி சாப்பிட்டு விட்டு 'Have a nice lunch, friend' என்பார்.

இன்னொரு நண்பர் இருக்கிறார். வாய் கூசாமல் பொய் சொல்வார். சம்பளத்திலிருந்து, Girl friends எண்ணிக்கை வரை பொய்யோ பொய் என்று சாதனை படைப்பார். அஜித்குமார் பக்கத்து வீடு என்பார். 10th Std Exam-ல் கணக்கில் நூற்றுக்கு நூறு என்பார். 45 + 35 எவ்வளவு என்றால், 5 நிமிடம் யோசித்து, உடம்பு சரியில்லை, நாளைக்கு சொல்கிறேன் என்று நழுவுவார். இப்போது இவர் ஒரு MNC-யில் HR Dept-ல் வேலை பார்க்கிறார், 'Right person for right job' !

எனது இன்னொரு நண்பர் ஒரு கெட்ட வார்த்தை களஞ்சியம். தமிழில் உள்ள எல்லா கெட்ட வார்த்தைகளையும் பட்டியல் போட்டு, எனக்கு இப்படியெல்லாம் கெட்ட வார்த்தை பேசினால் பிடிக்காதென்பார். அவர் வாயில் ஒரு நல்ல வார்த்தைக்கு இரண்டு கெட்ட வார்த்தை வரும் !

என்ன இருந்தாலும், இவர்களெல்லாம் எனது நண்பர்கள். இவர்களை விட்டுக் கொடுக்க முடியாது. நம்மை சுற்றி இருக்கும் மனிதர்கள், நம் வாழ்க்கையில் எதாவது ஒரு Impact - பாதிப்பை எற்படுத்துகிறார்கள். எந்த ஒரு மனிதனுக்கும், Positives Negatives என இரண்டுமே இருக்கும். எதை எடுத்துக் கொள்ள வேண்டுமென்று நாம்தான் முடிவு செய்ய வேண்டும் !

மின் அஞ்சல் ரகசியங்கள் Version 2.0

நேற்று வலைப்பதிவிற்கான ப்ளாக் (Blog) தொடங்கியுவுடன் பெரிய எழுத்தாளராகி விட்டோம் என்று ஒரே மஜாவாக இருந்தது. அதே மப்பில் வீட்டிற்கு சென்று, இரவு படுத்த போது வெகுநேரம் தூக்கம் வரவில்லை. ஒருவழியாக தூங்கிய போது கலர் கலராக நிறைய கனவுகள் வந்தன. கனவில் சுஜாதா வந்து பேட்டி எடுத்தார். 'எப்படி இவ்வளவு சுவாரசியமாக எழுதுகிறீர்கள் ? வளர்ந்து வரும் இளம் எழுத்தாளர்களுக்கு உங்கள் அறிவுரை என்ன ?' என்று நிறைய கேள்விகள் கேட்டு ஆனந்த விகடன் 'கற்றதும் பெற்றதும்' ல் சிலாகித்து எழுதுவது போலவும், பெங்களூரில் தேசிகன் எனக்கு பாரட்டு விழா எடுப்பது போலவும் கனவுகள் வந்தன. புக்கர் விருது பெறுவதற்குள் தூக்கம் கலைந்து விட்டதால், எழுந்து சென்று விட்டேன் !

நேற்று எழுதிய முதல் பதிவைப் படித்து விட்டு, நண்பர்கள் சிலர் கடிந்து கொண்டனர் (அதாம்ப்பா..கெட்ட வார்த்தையில திட்டினாங்க...). நான் எழுதிய தூய (?) தமிழ் புரிய வில்லையாம். சரி, நம்ம ஸ்டைல்ல பூந்து விளையாண்டுருவோம் என்று இதை எழுத ஆரம்பித்து விட்டேன். அனைவருக்கும் புரியும் படியாக அமைய, ஓரிரு ஆங்கில வார்த்தைகள் நடுவில் வந்தாலும் OK என்பது என் கருத்து.

இந்த பதிவின் பின்வரும் பகுதிகள், ஒரு மாதத்திற்கு முன்பு எழுதப் பட்டவை. இங்கே ப்ளாக் தொடங்கும் முன், முரசு அஞ்சலில் எழுதி, நண்பர்களுக்கு மின்னஞ்சலில் அனுப்புவேன். அதனை சிறிது திருத்தி Version 2.0 ஆக இங்கே வெளியுட்டுள்ளேன். படித்து விட்டு உங்கள் கருத்துக்களை பின்னூட்டம் (அதாம்ப்பா..Comments..) மூலம் தெரிவியுங்கள்!

இளம் வயதிலிருந்து, என் மாமாவிடம் தங்கி படித்ததால், பெற்றோருக்கு அடிக்கடி கடிதம் எழுதுவதுண்டு. காலேஜ் படிப்பு முடியும் வரை போஸ்ட் கார்டிலே எழுதிக் கொண்டிருந்தேன். வேலை கிடைத்து ஹைதராபாத் சென்றதும், இன்லாண்டு கார்டில் எழுத ஆரம்பித்தேன். முதலில் வாரம் ஒரு முறை எழுதத் தொடங்கி பின் மாதம் ஒரு முறை கடிதம் எழுதி அனுப்பினேன்.

பிறகு எனது கிராமத்தில், அடுத்த வீட்டில் போன் வந்த பிறகு, போன் செய்வது அதிகமாகி, கடிதப் போக்குவரத்து குறைந்தது. இருப்பினும் அவ்வப்போது வீட்டிற்கு கடிதம் எழுதுவது நிற்காது.

மும்பை வந்த பின், சில கடிதங்கள் எப்பொழுதாவது எழுதி அனுப்பினேன். மும்பையில் நான் தங்கி இருக்கும் கன்சோலியில் போஸ்ட் பாக்ஸ் இல்லாததால் (அ) போஸ்ட் பாக்ஸ் இருக்குமிடம் தெரியாததால், ஒவ்வொரு முறையும் கடிதத்தை Postbox-ல் சேர்க்க கோப்பர்கைரனே செல்ல வேண்டி இருந்தது. இது கடினமாக இருந்தது. இந்த சமயத்தில், எனக்கு மொபைல் போன் கிடைத்தது. போனில் அடிக்கடி வீட்டை தொடர்பு கொள்ள முடிந்ததால், கடிதம் எழுத அவசியமில்லாமல் போனது. இவ்வாறு நான் கடிதம் எழுதுவது, நின்று போனது.

படிப்படியாக கடிதம் எழுதுவது குறைந்து, நின்று போனாலும், டெக்னாலஜி காரணமாக மின்னஞ்சல் (Email), 1999-ல் எனக்கு அறிமுகமாகியது. நான் முதலில் Internet என்றால் ஏதோ மீனவர்கள் உபயோகப்படுத்தும் வலை என்றும், Email என்பது ஏதோ ஷாக் அடிக்கும் எலெக்ட்ரானிக் சமாச்சாரம் என்றும் நினைத்திருந்தேன். பின் நண்பர்கள் விளக்கியதும், பலரிடமும் Email Account உருவாக்குவது ப்ரீதான் (Free) என உறுதி செய்து கொண்டு, ஒருவாறாக Email Id ஒன்றினை கிரியேட் செய்த போது, ஹைதராபாத்தில் நாய்க்குட்டி கூட Email Id வைத்திருந்தது!

ஆரம்பத்தில் ஒரு ஆர்வத்தில், ஏழெட்டு வெப்சைட்களில் Email Account கிரியேட் செய்து வைத்தேன். ப்ரெண்ட்ஸ¤க்கு ஒன்று, பல கம்பெனிகளுக்கு Resume அனுப்ப ஒன்று, மொட்டை கடிதாசி எழுத ஒன்று. காதல் கடிதங்கள் எழுதுவதற்காகவே ஒரு Id வைத்திருந்தேன்.வாரம் பத்து காதல் கடிதங்கள் எழுதி வனஜா, கிரிஜா, சரிகா என்று மானாவாரியாக அனைவருக்கும் அனுப்பி விடுவேன். இந்த அனுபவங்கள் பற்றி பிறகு இன்னொரு கட்டுரை எழுதலாமென்று இருக்கிறேன், நீங்கள் கெட்ட வார்த்தையில் திட்டாமலிருந்தால்!

இவ்வாறு ஏழெட்டு Idகள் கிடைத்த பிறகு, தெருவில் போவோர், வருவோர் என அனைவரிடமும் Email Address கொடுத்தேன். பேப்பர் போடுபவர், செருப்பு தைப்பவர், காய்கறிக் காரர் என ஒருவர் விட வில்லை. அப்படி இருந்தும், ஒரு மெயில் கூட வர வில்லை. Account deactivate ஆகாமலிருக்க, நானே ஒரு Idயிலிருந்து, எனது இன்னொரு Idக்கு மெயில் அனுப்பி, அதைப் பிறகு Open செய்து, வியப்பேன்.

இது ஒரு பக்கமிருக்க, 13 பக்கத்திற்கு என் Resume தயார் செய்து, தெரிந்த, தெரியாத கம்பெனிக்கெல்லாம் அனுப்பினேன். கனவில் Microsoft, Intel, IBM, Infosys, Wipro என்று எல்லா கம்பெனிகளும் Interviewக்கு அழைத்தன. HR Roundடெல்லாம் முடிந்த பிறகு, பில்கேட்ஸ் என் கையைப் பிடித்து Microsoftல்தான் சேர வேண்டுமென்று கேட்டுக் கொண்டார். கனவு கலைந்த பின், எழுந்து பல் தேய்த்து, குளித்து, பஸ் பிடித்து ஆபிஸ் சென்று விடுவேன்.

பார்க்கும் வெப்சைட்டில் எல்லாம் பேர் கொடுத்து வைத்ததால், நிறைய Advertisement Mails வர ஆரம்பித்தன. USAவில் எங்காவது Pizza கடை ஆரம்பித்தால் கூட எனக்கு மெயில் வந்தது. உலகத்திலுள்ள எல்லா பேங்குகளும் எனக்கு Credit Card கொடுக்க முன் வந்தன. வாயில் நுழையாத பெயர் போட்டு வந்த மெயில்கள், எனது Bank Account No. கேட்டன. Jane, Sucy, Andy போன்ற மேல்நாட்டுபெண்மணிகள் மெயிலில் என்னைத்தான் திருமணம் செய்து கொள்வேன் என்று அடம் பிடித்தார்கள்.

என்னுடன் வேலை பார்த்தவர்களில், சில பையன்கள் ரவுசு அதிகம் பண்ணுவர். அவர்களுக்காக பெண்கள் பெயரில் மெயில் அனுப்பவதுண்டு. ஆரஞ்சு கலர் பேண்ட் சட்டையில் அம்சமாக உள்ளாய், மீசையை எடுத்து விட்டு, குளிர் கண்ணாடி அணிந்தால் ஹிரித்திக்ரோஷன் போலிருப்பாய் என்று இஷ்டத்துக்கு மெயில் அனுப்புவோம். பையன் அதை நம்பி மறுநாள் ஸ்டைலாக வருவான். Side Poseல் பார்த்தால் தெலுங்கு காமெடி ஹீரோ போலிருக்கும்!

இப்படி இண்டர்நெட் எனக்கு சிறந்த பொழுதுபோக்கு சாதனமாக இருந்தது. இவ்வாறாக பற்பல லீலைகள் புரிந்து ஒருவழியாக 2003 டிசம்பரில் மும்பை மாநகர் வந்து சேர்ந்தேன். இன்னும் பற்பல இண்டர்நெட் அனுபவங்கள் உள்ளன. அவற்றை வரும் வாரங்களில் ஒவ்வொன்றாக எழுதுகிறேன். மீண்டும் சந்திப்போம், நன்றி!

நண்பர்களுக்காக ஒரு பதிவு..

வணக்கம் நண்பர்களே, இனிய மாலைப் பொழுதுகள் உங்களுக்கு உரித்தாகுக! தமிழ் வலைப்பதிவுகளுக்கு நான் புதிய ரசிகன். கடந்த மூன்று மாதங்களாக வெவ்வேறு நண்பர்களின் வலைப்பதிவுகளை படித்து ரசித்து விட்டு, இப்போதுதான் இந்த புதிய தமிழ் வலைப்பதிவை உருவாக்கியுள்ளேன். இங்கே ஏதாவது என் பார்வையில் படும் சுவாரசியமான சம்பவங்கள், என் கடந்த கால அனுபவங்கள் மற்றும் எனக்கு தோன்றுபவற்றை எல்லாம் கிறுக்கலாம் என்று இருக்கிறேன். நீங்கள்தான் பொறுத்தறுள வேண்டும்!

தமிழில் தட்டச்சு செய்வது எனக்கு புதிதானது. முரசு அஞ்சல் மென்பொருளுக்கு நன்றி. தமிழில் எழுதுவதே (எனக்கு) அரிதாகி விட்ட நிலையில், இது ஒரு இனிய முயற்சி என்றே கருதுகிறேன்! இந்த வலைப்பதிவை உருவாக்க உதவிய தேசிகன் (எழுத்தாளர் சுஜாதாவின் முதன்மை சீடர்) , சுரதா (பொங்குதமிழ் மென்பொருள் அளித்தவர்) மற்றும் ஊக்கமளித்த நண்பர்களுக்கு நன்றி !

என்னைப் பற்றிய அறிமுகம்

பெயர் : ஜோதி. சுவாமிநாதன்
வயது : 26
வசிக்கும் நகரம் : மும்பை
வேலை : தொலைத்தொடர்பு மென்பொருள் சோதனையாளர்
சொந்த ஊர் : திருச்சி